MBL TAN A NI LEH DAWN TA

12^th November, 2017

MIZORAM BADMINTON LEAGUE TAN A NI LEH DAWN

A vawithumna turin Hrangbana Memorial Mizoram Badminton League chu Dt. 13-24,November, 2017 chhung hian Electric YMA Hall-ah khelh a ni leh dawn a, kumin ah hian Team hrang pariat telin Pool A leh B ah then a ni a, Pool A ah hian Hlimen Shuttlers, Tuikual Shuttlers, Zotlang Rockets leh Brig. & Mrs. T. Sailo KANAN te an awm bakah Pool B lamah Mission Veng, Southern Acers Siaha, Chanmari Evening Stars leh Ralte Villa BC Champhai te an awm bawk a ni.

Pool A leh B te hi intum kualin League point-a sang pahnih ve ve ten Semi-Final an khel dawn a ni. Inelna tur hi Category hrang hrang panga – U19 Boys Singles, Mens Singles – 1, Mens Singles – 2, Mens Doubles leh Mixed Doubles te an ni anga, Category khat zel hian Point khat a keng bawk ang.

MBL Flick Off programme hi Dt. 11.11.17 zan dar 8:15 khan Pi Zaii Hall, Synod Conference Centre ah neih niin he hun hi MBA Patron Pu R. Lalzirliana’n a hmanpui bawk a ni. He khuhhawnna hun hmanah hian Team hrang hrangte Jersey bakah Players leh Team Officials te inhmelhriattirna hun hman a nih bakah October 26-29 chhunga neih zawh tak SUDAMA Cup-a Mizo Shuttlers chetha pathum Pu Lalthanzuala, Pu Lalmuanawma leh Pu K Ramzauva te hnenah lawmpuina thuziak hlan a ni bawk. MBL Tie hmasa ber hi 13.11.17 tlai dar 5 ah Tuikual Shuttlers leh Hlimen Shuttlers ten an khel a nga, dar 8 ah Zotlang Rockets leh Brig. & Mrs. T. Sailo KANAN ten an khel ve bawk ang.